Тюку по’ Тимофей Петрович Синицын, толаӈгода’’ паднанам’ Пэля Пунухӈэ’ теневадо’, юр’’ няхар’’ ю’’ пангусь. Паднана 1894 по’ ты’ саполана ирий няхарамдэй толыркана Архангельской губернияхана Шенкурской уезд’ Демидовской нювм’ нюбета ӈэсыхына соявысь. Пыда Ӈэрм’ яхана илесь, манзарась, маня’’ округна’’ ӈадимданавам’ хари’’ сэвханата маниедась. Хурка сер’’ тамальӈгы похо’’на’’ танеса, тикым’ падвы манзая’’амната маниева’’.
1925 по’ ӈэрёйхана губерской отдел народного образования Едэй яхана илена’’ хибяри’’ е’’эмня школа-интернатм’ нэвась ятнаць, тарця манзаям’ сертаванзь Тимофей Петровичм’ таслаць. 1926 похона Белушской Губа ӈэсына таняна таневы хэхэ’ хардахана ненэця’’ ӈацекы’’ тохоламбава’’ е’’эмня школам’ нэць. Едэй яхана ӈадимы ненэцие’ школа’ нертей ервотаӈэ, нертей тохолкодаӈэ Тимофей Петрович Синицын хаясь.
Округна’’ народной образование’ ӈадимдембавы серкана манзаравы’’ поӈгана пыда нертеясь.
Тамальӈгана яханандо’ школам’ ӈадимдева’’ сер’’ Тыко Вылка сававна ядабтадась, пыда тарця серкана тохолкода’ нертей нядаӈгодаӈэ хаясь. Ӈобкана ненэця’’ нулӈгава яхат’’ школа – интернатан’ ӈацекы’’ ма’’ламбиць. Ханяӈы ненэця’’ тамбир’ ӈахы’ ян ӈацекыдо’ ӈэдараван’ нидаць’ харва’’. Пыди’ ненэцие’’ мят’ тобнанди’ тоходанава’’ сер’’ тарана, сава серӈэ вадецетыди’. Янамбовна ненэця’’ торума’’. Едэй я’ тер’’ тоходавам’ харвабтадонзь. Едэй школан’ харвась нюдо’ тэврабсетыдо’.
Ӈацекы’’ тоходанаць, интернатхана илець, хусувэй ӈамгэдо’ танесь. Тикахад пионерӈэ хаяць. Тарем’ янамбовна ӈэрм’ яхана илена’’ едэй товы илан’ торумданаць.
1926-1928 похо’’на Тимофей Синицын Пешахана (Канино-Тиманской хойхана) выӈгы школахана тохолкодаӈэ манзарась. Пыда несэй ям’ манэ’’ӈа’’, илевада несэвна сюрхалъй. Ӈэрм’ яхана пыда тохолкода манзаям’ мэнелӈа, нянэювна паднанаӈэ хая. Таняна илеванда сер’’ пили’’ дневникм’ падабись. 1928 похона Пэля Пунух ненэцие’’ школаха’’на’’ ханзер’’ манзарамида «Народный учитель» журналкана падвыць, тамальӈгы похона «Работник просвещения» издательствохона Тимофей Петрович Едэй Я’ нямна падвы книгада тарпыць. Тарем’ паднава сехэрэмда пядась.
Нянэвна Пэля Пунух няхар’’ юдимдей еркы’ похо’’на паднась. Ӈоб’’ пирувна книгида московской издательствохона тарпурӈаць, Архангельскхана «Борька в тундре», «Девочка Савоне», «Новоземельские будни», «Не по шаману». 1931 похона Пэля Пунух Архангельск’ маркана «Пята тысячелетий» книгида тарпыдаць. Сян’ по’’ ваерась паднана тикы книгамда’ несэюмдадась, повестьда’ «Пята тысячелетий» едэювна нюмдедась. Тикы повестьда ӈани’’ падвы манзаяхатата’’ яӈга, луца’’ вадавна манзь – драматической произведение. Нертей падвы’’ повестьха’’на ханена’’ нямна падна. Тюкохона ӈэрм’ яхана ненэцие’’ ил’ тамна тяхана хурка ӈэвам’ падаби. Книгахана манэ’’лабтамбида ханзер’’ ненэця’’ едэй товы’’ ил’ ядабтадо’.
Пэля Пунух таняна илесь, ненэцие’’ илм’ маниесь, тикы поӈгана ханзер’’ невхы похо’’на’’ ненэця’’ илевы’’ тарця сер’’ ихинанда тасламбидась, ненэцие’’ хонрабись. 1932 похона «Стрела восстания» повесть’ падба пясь.
Пэля Пунух советской литературахана нертейӈэ ненэця’’ нямна паднанаӈэ толы.
Сайнорма по’’ мальӈгана Архангельскхана илесь, «Правда Севера» газетахана корректорӈэ, корреспондентаӈэ манзарась. 1945 похона ты’ саполана ирийхана Шенкурской район’ редакциян’ манзараванзь ӈэдарадонзь.
Ида’ ӈани’’ пили’’ ӈэрм ян’ ладарӈась. Сайнорма’ пуд пыда ӈани’’ Ненэцие’’ округан’ товысь, несэювна школахана манзарась пядась, Хоседа-Хардхана Большеземельской роно инспекторӈэ
манзарась.
Тикы поӈгана Едэй Яхана «Правда Севера» внештатной корреспондентӈэ тарась.
Паднана ӈокавна ненэцие’’ ил’ нямна паднась, ненэця’ нюмда танесь Пеля Пунух, тарем’ теневава’’. Харта ненэця’’ поӈгана илесь, манзарась, хусувэй хойхана таневы сер’’ маниейдась. Ӈэрм’ ям’ сававна торумдавы, ӈэрм’ ненэця’’ илӈгана илевы хибяри ӈэвысь.
1951 похона Пеэля Пунух Архангельскан’ тось. Таняна пыда пудана ялута ӈэсонд’ илесь, манзарась. 1971 по’ саво ирий 18 толыркана яӈгумась. Поморье’ мардета маркана сюры.