Я’ сяр’ ниня хари’’ вадидо’ лэтрава’ нямна ӈарка конференциям’ мэ’’ӈaць. Тикадо’ ООН ӈадимдевы ю’’ по’ няю’ минренадо’, нябимдей ӈобт’ тэвормадо’. Ӈокханда 150 хари’’ вадандо’ нямна идо’ нярканана’’ ненэця’’ товыць, тет юкад вата яхад ӈэвы’’, ханяӈыдо’ ӈани’’ пареӈода’’ я’ тер’’.
Тамбир’ ӈарка ма’’лёвам’ ФАДН’ ӈэвахана мэна конференциям’ нэдась. Пыда ма’’нисяв:
– Маня’’ яханана’’ тянё тэнз’’ вади’’ лэтрава саць ӈарка сер’’. Тикы’ нямна Россия яна’’ серо’ ня’’амбада’’, хусувэй тэнз’ мэтахана ӈарка няд’’маӈэ тара’’.
Вадам’ лэтрава нензел’’ ни’’ӈа’’, тарем’ ӈод’’ минрена манзаява’’ сэвхана ӈaди. Тюку илаӈгана хари’’ вадам’ мэ’’ма, минрева тоенанаӈэ толы, хусувэй вада’ тэнз ёхова’ пир’’. Ненэйвана толырто’ тянё ненэця’’ харто’ вадидо’ мэ’’ман’, лэтраван’ харвабцодо’ танябата, тикахана маня’’ хамедамбива’’, тэравы сехэрэва’’ тидпой’ миӈа.
Сидя яля’’ ямбан’ хуркари’’ я’ тер’’ ӈaмгэм’ ваде’’мадо’ ӈани’ таро’’ӈаць. Хусувэй серкана серо’ теневана’’ вадам’ тидхалембиць. Тад таслаб’’, хусувэй яхана тянё тэнз’’ вадидо’ лэтрамба саць тэтна’’. Ханяӈы’’ яха’’на помнандо’ мэта вадандо’ тэнз’’ ӈули’’ ӈока ӈэвы’’. Тарем’ Индияхана ненэцяндо’ ӈокадм’ толабаб’’нандо’ хусувэхэна едэй вади’’ тэнз мэти хомби’’. Яханандо’ сидя ёнар’’ вадандо’ тэнз’’ танявы’’. Тикахат 122 толырто’ тянё тэнз’’ ненэцие’’ вадаӈэ толы’’. Сидя ю’’ сидя вадарим’ тохоламби’’. Ӈани’’ нито’ вада’’, тянё тэнзӈэ толёда’’ вада’’, хари’’ тэнзаридо’ помнандо’ лахана мэ’’эйдо’. Ваданандо’ янамбовна юрувандаӈэ тасламбидо’.
Вадам’ лэтрава тоенана серӈэ хантана’’.
Школахана ӈацекы’’ вадахато’ тохоламбава’ нямна ӈани’’ лаханаць. Маня’’ округхадана Людмила Талеева, округна’’ центр’ развития образования манзарана, няби Парасковья Выучейской, Красной ӈэсыхына ӈацекы’’ ненэця’’ вадан’ тохоламбада, таняна манзараӈаханзь’. Красной ӈэсыхы’ тохолкода Парасковья Ивановна таняна лаханась. Яханана’’ ханзер’’ вадамдо’ тохоламбавамдо’ хэтась. Парасковья Ивановна’ юнда етри’ ханярина сосеты, теда’ ӈод’’ ӈока ненэцие’’ поӈгана лаханаванда мальӈгана хэтамбада’’ вадида’ тидпой’’ ха’’морӈаць. Ӈацекыда урокахата нидо’ нертемба сюрамбасеты’’, вадамдо’ тохоламба маймбасеты’’. Ӈамгэри серка’’на школаханандо’ сяхаӈгарт’ нисеты’’ хадю’’.
Тодо яхат товы’’, вадито’ нямна няркнана’’ ненэцяӈг’ инзеле’’махад тарем’ тасладось: – Я’ сяр’ ниня тянё тэнз’’ вади лэтрава ханярина тоенана сер’’ ӈэдараха. Ӈока тэнз’’, вадидо’ мэбе’’ӈа’’, ӈaдьбята хэвханандо’ мэна’’ ӈaрка вада’ мюня’ хан’’ӈa’’. Тарця яӈгова’ е’’эмня хари’’ тэнзадо’ лэтравандо’, вадидо’ мэ’’мандо’ е’’эмня ӈока я’ тер’’ ӈобт’ ма’’люрӈаць.
Тарця ма’’лёвидо’ хусувэй сидя по’ ваерась мэцетыдо’. Тамна сидя по’ хэ’’мяхад яӈор’’ ӈобт’ ма’’лёда’’. Ӈарка тасалковадо’ Россияна’’ ӈоб’’ маркана ӈэӈгу. Сидя ёнар’’ сидя ю’’ матадамдэй похона вада’ серу’’ тасламбада’’ хибяри’’ хурка маркана ма’’лаӈгуд, нерняна таслаӈгудо’. Ӈaтенаӈгува’’, ӈодь’’ сидя по’ ямбан тамна ханяӈэхэва вадана’’ тэнзм’ нёхова’’ юр’’. Хари’’ вадавнанда лаханада’’, тохоламбида’’, нерня’минреда’’.